尋親
不知何故，過去8個月接左有近150宗「尋人委託」，統計番前年全年都是不過百宗。委託中有近七成係尋親人案件，想搵番啲失聯十多廿年嘅親人，有父母尋子女，子女尋父母，兄尋弟，弟弟尋家姐，或尋找其他親人。過去幾十年本港經濟生活安穩，又不是戰亂走難。但這類親人離散，只能說「各有前因」、「家家有本難諗的經」。
有不少求助者手上資料相當有限，部分會有齊失聯人士嘅詳細資料，甚或者有張相，但有不少除咗個中文名就乜都冇!
各位會問：「尋人點解唔去報警或者紅十字會？」有免費服務不取，反而俾錢搵調查公司? 其實大家有所不知，好多尋人案警方同紅十字會不一定幫到你。本欄曾經講過，警方尋人尋嘅係「失蹤人口」，簡單說即好地地喺你身邊，可能因為種種理由而突然人間嘅人，並不是好耐冇同你聯絡，甚至係你根本未見過嘅人(未成年子女或受監護人除外)。一般家人離家報失蹤，就算警察搵到人，基於對方係成年人，失蹤人可自行銷案，差人都唔可以話你知佢喺邊。所以尋親案，警方未必立案處理。
至於紅十字會，由於機構政策，只能夠協助尋找因天災或戰亂，兩岸三地失散的親屬，而唔會幫你搵其他原因導致失蹤嘅其他人。所以，社會上先有如此尋人需要，但委託不得其門而入的無助人士。而「調查公司」正好扮演著填補上述機制空隙的角色。
一目偵信 – 上校
作者簡介
調查公司高級總監，曾當軍旅生涯，亦曾為人師表，轉投調查生涯，只為人生加添豐厚色彩。認為調查工作，有如行軍布陣，歩歩為營，不能稍有差池。享受艱苦搜證過程，從抽絲剝繭中，破解隱藏，還原真相。
