撫養權搜證

 

今日收到個電話查詢,諮詢人因為搞離婚爭子女撫養權,想我哋跟蹤佢太太,搜集證據證明對方唔係一個稱職盡責嘅好媽媽。Case當然冇問題,不過問題係諮詢人想話五日內完成工作。聽到佢嘅要求,即時同佢解釋其實冇可能。唔係調查公司冇可能做,而係呢種個案嘅調查工作唔應該咁短時間。我哋唔係要拖長嚟做呃客錢。要知道,呢種case當事人雙方已經係明刀明槍開波爭撫養權,既然開戰,就預對方會千方百計搵不利自己嘅證據,就算有一方本身真係蒲精,爛賭,唔顧家,喺呢段非常時期點都要扮下嘢,飾演番個好父母,平時生活上及公開場合盡量做足戲,對小朋友呵護有嘉,營造和樂融融畫面預咗你嚟影。所以,搜證工作絕不同於觀察一個人嘅生活作息規律三五七日見功,而係須要同目標「鬥磨」,先有機會喺一段長時間內等佢漏招。困難嘅仲要係唔止一次入到佢位,必須要多次「得分」先有機會被法官採信,可想而知,調查難度,同搜證過程付出嘅時間、心力、耐力絕對同捉專業假工傷騙子有得fight。 可惜諮詢人似乎仲未理解,一味淨係想快啲完工,慳番啲錢打官司。唉,有時真係唔明,打得官司當然想羸,既然如此,點解要為慳錢而損失有力證據而失去勝訴機會? 咁豈不是白花了調查費同律師費,賠了夫人又折兵?點計都唔划算啦! 不過,大家成年人,your own choice, take your own risk. 唔通拿把刀監佢咩? 祝佢好運啦。

評論

評論

2