老千偵探 – 勾線監聽

經常收到好多來電查詢:「如果得個電話號碼,可唔可以幫我勾線監聽?偷聽收幾錢?」佢地好多都係睇得偵探片多,或者唔知喺邊度聽番嚟話畀個「冧把」私家偵探就可以幫人勾線。我在此話畀大家知,咪咁白痴啦!

老老實實,喺未有數碼通訊嘅年代,全香港都仲係用緊地線,果個年代要勾線監聽,技術上一啲都唔難,只要喺線槽做手腳就可以進行監聽。但係而家手機數碼時代就唔係個樣野啦!

「勾線監聽」,一係你喺個台內部入手,一係政府特定單位先可以做到,一個私家偵探又好,有呢方面常識嘅人又好,要收幾多錢調查費先值得同你搏呀?如果有邊間調查公司話得嘅,保證佢200%係老千!
有人會反駁話只要有套器材,咪唔使靠關係囉。係,理論上你可以咁諗,但實際上你估入一套咁嘅系統要幾大成本呢?五百萬定一千萬?一間偵探社花唔花得起呢筆錢?呢類軍工器材,有錢都買唔到啦。仲有,用腦諗下都知啦,如果真係有套咁嘅嘢,仲使乜開調查公司呀?只要搵番三幾個大孖沙嘅電話號碼當收音機咁聽,日日跟住玩幾手,唔使做啦!如果勾到線,使鬼開什麼偵探社、調查公司咩?仲同你搏咩?你話係咪完全唔合邏輯呢?各位,私家偵探絕對唔係007!

blog04

一目偵信 – 上校

作者簡介

調查公司高級總監,曾當軍旅生涯,亦曾為人師表,轉投調查生涯,只為人生加添豐厚色彩。認為調查工作,有如行軍布陣,歩歩為營,不能稍有差池。享受艱苦搜證過程,從抽絲剝繭中,破解隱藏,還原真相。

評論

評論

6