工傷騙案搜證!

接咗幾宗工傷調查case,正如大家所知,而家好多呃工傷個案背後係有專門人士教路,所以僱主想要掌握有力證據,真係冇以前咁容易。

好似這星期接的一宗委託,target從事冷氣工程,一年多前開工時不慎壓傷右腳,影響行路,睇醫生睇到而家,累計向委託人索償亦已數十萬。雖然委託人懷疑其中有詐,奈何target一直在政府醫院覆診,而醫生又一直批出假紙,所以亦拿他沒辦法。而target每次都由一位朋友及一律師樓職員陪同到公司處理請假及賠償事宜;這一點令委託人懷疑。

為了弄清真相,委託人曾經嘗試在target返公司續假蒲頭機會自行跟蹤,及後又請過其他私家偵探進行跟蹤,最終都因為不夠專業而失敗告終。最慘仲係之前的跟蹤被target發現,被對方質疑是否唔想賠錢而搵人騷擾自己。

我哋都接唔少上手做黃咗嘅case,亦都預計一定會比較難做。第一次埋位當日,見target同兩男子一齊步出委託人公司,沿途見佢行路真係一跛一跛。不過唔好睇佢行成咁,一行三人穿插鬧市中,街頭到街尾飛咁快!咁「跛」法,我哋班手足都唔敢掉以輕心。除咗快之外,我哋仲發現這三人是五步一回,十步一望,三人且行且回頭行咗四五個街口,最後target一人自行離隊。獨行的target雖然交足戲keep住跛,但竟然越行越快。以我哋嘅經驗同直覺,好明顯係因為之前被跟而變成驚弓之鳥,加上本身行古惑身有屎,先會如此擺明車馬,高姿態地作出示警。不過我哋幸不辱命,跟蹤target回到上水一屋邨單位,而地址卻與委託人提供員工資料的深水埗住址風馬牛不相及!後經查證,target向公司報的地址是個空置唐樓單位,基本上可以說是一個大眾住址登記之家。既已鎖target定住處,再花點時間,總會有錯處漏洞。

blog04

一目偵信 – 上校

作者簡介

調查公司高級總監,曾當軍旅生涯,亦曾為人師表,轉投調查生涯,只為人生加添豐厚色彩。認為調查工作,有如行軍布陣,歩歩為營,不能稍有差池。享受艱苦搜證過程,從抽絲剝繭中,破解隱藏,還原真相。

評論

評論

4