私家偵探唔係特務

一目偵信

私家偵探唔係特務,不是007。我哋只係民間中小企。所以希望各位唔好再當我哋007,須知現實世界中私家偵探做嘢係會遇到好多困難,而且有苦自己知,不為委託人道。今次同大家分享此行業嘅辛酸。

 

在等候跟監視行動中,肚餓可以忍,但人有三急就認真難忍。有次喺港島一豪宅區做等候,果種鬼地方,不僅方圓附近想買個包都難,更大鑊係冇廁所,就連似樣啲嘅樹叢作遮掩都欠奉(女調查員難堪莫過於此)。咁嘅環境,既要保證人手安排不受影響,又要考慮調查員之需要,手足食飯或解手,不能導致現場變成真空,目標分分鐘都會出動,行開行埋時補位。呢種額外人力資源投入,令運作上加重咗一定成本。

 

除咗人的需要,case本身亦難免有突發狀況,最常見係遇到突發交通事故導致跟車甩咗,如車多阻塞,目標車輛衝燈尾等,客人就必然責怪工作不力,無用等種種難聽說話。

 

雖說羊毛出在羊身上,case中的必要開支可以實報實銷,但有時有些瑣碎支出,或是個別特別的安排,又未必會同委託人計到咁足。例如客人告知大廈只有兩個出入口,臨場卻發現還有第三個出口,加人手就必然要加錢,但我哋呢行,有時同委託人之間的互信互動係好難精算權衡的。然而呢個卻係我哋口碑建立,有唔少介紹客同返頭客嘅原因之一。

 

資訊科技發達,即時通訊確實有利掌握前線手足工作的行動實況,運籌帷幄,避免延誤,亦方便委託人了解個案最新發展。但其實又係一把兩面刃,既方便做case,亦為我哋做case帶來滋擾。試過有啲心急的委託人,3點開始工作,而追問進展嘅訊息已經開始一浪接一浪殺到! 呢種奪命追魂app,如在跟蹤調查行動關鍵情況下出現,確實會對我們工作造成困擾,但又非每個委託人都通情達理,須費唇舌解釋,此亦一苦也。

 

當然,不能奢望人人都能理解我們的苦況,但至少希望大家減少誤解,坊間不少私家偵探都只識吹噓扮勁,其實,我哋都係平凡人。

評論

評論

About