節目訪問

上星期受港台節目訪問,主持人問偵探呢行有冇D所謂『季節性』case。一年裡面會唔會有啲case係喺某個時期特別旺場嘅呢?

可以話比大家知,其實係有嘅;不過當時小弟亦都有同個主持強調,唔同種類嘅case一年三百六十五日都有,而所謂「季節性」或「特別旺場」,只不過係有一啲問題會喺某啲日間比較容易出現,而令到呢一類委託有可能較平時多D咁解,絕對唔會好似個間以女人班底為偵探社之前向傳媒話,委託數字忽然嘭一聲大幅飊升,仲話咩一個暑假做過百宗子女行為調查。小弟覺得打開門做生意,做下博宣傳無可厚非,但絕不能為咗宣傳而利用傳媒向公眾放假料,仲要將假數據包裝到有統計數據咁欺騙市民,學『毓民議員』話齋,非常不該!

好簡單,大家試諗下,要旺角警署一個月處理一百宗case,唔好話大嘢,就輕如店舖盜竊或風化案好未?點做?就算其他咩都唔理,全差館齋做呢一百單,點做?憑常識都知唔得啦!而家你間偵探公司好多人咩?就算你全職調查員加埋晒啲part time,點都多唔過一間差館掛?一單case,由同委託人開會計起,所有事前佈署、跟蹤行動、調查搜證、拆解分析到交報告比委託人,花幾多時間先搞掂?一個暑假個零月,你有幾多人同時開工、要同時處理幾多case先reach都一百宗呢個數字?仲未計你停晒其他類型嘅委託呢?

唔怕貨比貨,只怕你唔識貨。打開門做生意最緊要貨真價實。欺名盜世行古惑可能幫你賺到一時聲音,但我深信,信譽同實力先會令你贏得口碑。

blog04

一目偵信 – 上校

作者簡介

調查公司高級總監,曾當軍旅生涯,亦曾為人師表,轉投調查生涯,只為人生加添豐厚色彩。認為調查工作,有如行軍布陣,歩歩為營,不能稍有差池。享受艱苦搜證過程,從抽絲剝繭中,破解隱藏,還原真相。

評論

評論

6