大哥笑吳雨

[vc_column_text pb_margin_bottom=”no” pb_border_bottom=”no” width=”1/1″ el_position=”first last”]

大哥,娛樂圈中能稱得上大哥當然唔簡單,家陣大家都稱呼吳雨為大哥,但呢個咁勁嘅稱號,原來勁搞笑。話說當年吳雨仍在《歡樂今宵》捱世界,成班同事習慣齊齊到九龍城午飯,飯後例牌各散東西搞D私人嘢,差唔多時間就喺某間機鋪集合。吳雨早到便打嚇機先,點知他打慣的某部機被個學生仔霸咗,唯有依規矩擺個銀仔放喺部機上面排隊,等呀等,個學生仔砰砰Game Over,諗住有得打啦,點知個學生仔非常氣定神閒地從褲袋攞出另一銀入機,唔跟打街機規矩,吳雨即時火起,大聲要個學生仔過主,情急下擠出猙獰面容話:哼!仔,你知唔知我係邊個呀?我係大哥嚟㗎!嘩!度慣橋嘅佢當堂嚇窒學生仔,雞咁腳走人,機鋪內嘅EYT同事個個笑到碌地,從此人人笑吳雨係大哥,大哥前大哥後,其他人唔知乜頭乜路跟口叫佢大哥,大哥稱號由此煉成!

大哥的成長歷程充滿傳奇,原來負責EYT創作部的他,因為當年監制離去,五位資深導演激烈競爭上位,好地地坐山觀虎鬥的他,突然接獲上頭聖旨,破格提升他為監制;須知當年小編劇地位低微,天天被聲大大的幾位經驗豐富的大導演媽媽叉叉,寸少兩句,問候爹娘少點已相當俾面,突然由吳雨統領各位惡爺,加上對製作毫不認識,點死?吳雨自己知自己事,多次向上頭婉拒升職,最終竟然獲得頂頭大佬硬撐,天天陪他開會領導大軍,直至吳雨的EYT大哥身份被大眾認同,才正式交棒,升職升得咁型,抵佢做大哥啦!

有了大哥稱號,還需要有一定的內涵來襯個勁名,話說當年吳雨有感在公在私,晚晚例牌蒲夜店,他跟當年直屬手下何麗全睇準機會,在尖沙咀膽粗粗入股開酒吧Black Jack Inn,小店單靠朋友支持,要有生意必須坐陣做三陪,陪坐陪笑陪飲,身為編劇,前兩項梗ok,但飲酒嘛…。由於每晚必須賣出一定數量的酒,酒吧才不致虧本,吳雨和當年號稱雞全的何麗全便被迫晚晚狂隊,飲完嘔,嘔清再飲,在生意壓力下二人終於練成隊酒大法,及後打遍香港無敵手,北上連國內酒乜酒物都一一灌醉。有了勁酒量作本錢,大哥的稱號便來得合情合理;由於大哥豪飲太了不起,最終出事了,近年在英皇娛樂拍住上的大姐大Mani,某次竟提出挑戰,連同幾位美女聯手強攻鬥飲,唉!大哥邊會卻步,飲呀飲,靚女加酒精背後,原來暗藏殺機,Mani與靚女團圍困大哥於某空間內,不讓他有絲毫休息機會,連隊數小時後,終於打破大哥數十年不敗金身,勁劏一鑊!所以話啫,小心靚女呀!

吳雨大哥有無資格擔起大哥稱號,且容我介紹一下,當年他領導的手下包括收咗四億收山嘅《喜羊羊》之父盧永強,電影界猛人莊澄,統領NOW電視嘅何麗全,演唱會老細邱阿葵,當然小弟劉定堅都有份,白痴黎黎文卓,TVB綜藝部大批經坦及監制,台前幕後猛人一大批,稱得上大哥,無D背景唔似樣啫。

[/vc_column_text] [vc_column_text pb_margin_bottom=”no” pb_border_bottom=”no” width=”1/1″ el_position=”first last”]

blog14

堅定物流 – 劉定堅

作者簡介

三十年前創作《蝦仔爹哋》,開創盧海鵬無釐頭金句,創下處境喜劇神話記錄的劉定堅,八十年代轉戰烽火連天的港漫市場,創作了最輝煌年代的《中華英雄》,並成為極少數的代表,只憑藉創作人身份,建立個人出版企業《自由人出版集團》,創作並出版了包括《刀劍笑》、《超神Z》、《狄克戀曲》、《賭聖》等等大批經典漫畫作品;及後進軍小說市場,《刀劍笑新傳》開創了周刋武俠小說神話,憑逾百部作品打開了中、港、台三地市場,經過長時間投入電影及動畫創作及製作,年多前開始進軍國內影視市場,身兼編劇、導演、製作人及投資者四合一身份,繼續挑戰更複雜的龐大市場,延展創作生命。

[/vc_column_text]

評論

評論

About