致 王維基的公開信

王先生,雖然我們曾經是民生書院的同級同學,但你是學業成績優異生,既能考入中大,又是成功商人,我劉定堅中六也讀不完,跟你實在相差太遠。但當閣下決心進軍電視圈,碰巧又對我的《刀劍笑》有興趣,我便厚著臉皮在你的辦公室跟你開會,見識一下你這位相當了不起的風雲人物。

非常可惜,你給我的印象不禁讓我洩氣,原以為等了數十年終於有個儍老闆敢挑戰低能的TVB,大家幫幫你手,齊齊造福香港。豈料你竟然對影視毫不認識,更大鑊是你極度固執,乜都亂Q咁自以為是,我有點慌了,多次急切聯繫你下面的高層,盡量提出意見,渴望能輓回多少錯失,然而我顯然太不瞭解你這大老闆,原來你愛自己玩,把未來電視台視為退休前的私人玩具,機器、設備買買買,買完掉在倉庫當垃圾;人才請請請,請完並不懂得專業配合,錯配浪費人力物力;劇集拍拍拍,拍完才驚覺每集百幾萬成本不可能盈利。我不禁開始質疑,妖,你條友讀書叻、搞電訊掂關叉搞電視事咩,你乜Q都唔識,知唔知會害死好多盲目投向你懷抱的熱心員工㗎?

終於我大膽提出建議,用我的團隊、你的器材,再由我改劇本,免費同你拍任何一集你公司已拍好的電視劇,大家用相同資源,我要證明你的革命軍廢柴同盟根本不知所謂、不堪一擊!事前我唔睇帶,睇下我拍的在質量上跟你的所謂革命軍,究竟邊個勁。頂,點知貴公司怕到震,免費都唔敢試,驚甚麼公司製作人反應大,到此我對你的香港電視徹底心死,咁冇吉屎點砌TVB呀?

及後我寫文章《王維基行得快死得快》,在fb廣傳惹來全港網民注意,你在報紙專欄揚言逐點回應,卒之隨便說幾句便收聲,我在想,咁識縮就咪扮曬嘢啦,聲大大冇貨賣 !

隨之而來的失落電視牌照、十萬群眾遊行、暗渡陳倉奪得移動電視牌照到政府大玩搬龍門,香港人都不停在背後為你打氣,但老實說,你的表現令我更加失望。撐你的演員一個接一個合約到期、減薪、失業,我知道不少你揚言會再聘用的幕後人員,根本被炒後從未能回到原來工作崗位搏殺,你,問一下自己個良心,是否你的衝動,令太多的熱血有心人失望。他們因為你的號召,連上戰場的機會也沒有,前路茫茫,你有為過自己的失策而內咎嗎?你有想過把儲蓄戶口裡的數億元,分一些予員工們作為賠償嗎?

寫這篇文章是劉定堅一時激動,因為你條友亂Q咁噏,在專欄中說甚麼要製作適合香港觀眾的電影,那就不會適合內地觀眾,兩地文化差異,就是你對開拍電影卻步的原因。你究竟個腦有咩問題呀?有病去睇醫生啦唔該,單以《泰囧》作例子便亂說一通,我來問你,你投資拍《西游降魔篇》唔得咩?拍《激戰》會死咩?拍《寒戰》唔得咩?係都要搵部《泰囧》做例子,不如講《3D玉蒲團》啦,原來咸片才能賺錢,所以你唔玩電影 ! 妖,你咁廢早響啦,大家早知你唔可靠就當你放屁咪乜事都無囉!以單一部電影來斷定一切,如此腦袋,難怪你得閒走出來開記招,大聲講7月1日開台,轉過身又話開台無期。大佬,你點做人大佬㗎?擒擒青口輕輕,唉!大學生,唉!大老闆,唉 ! 大Q鑊!

我來再給你建議吧,網絡電視及電影雙翼齊飛,瘋狂投資全方位出擊,你到處找理由縮頭縮頸,成個契弟咁樣似乜鬼上市公司主席呀?玩唔起當日就咪大大聲扮型啦,騎咗上虎背梗要頂硬上啦,成日行出來搏同情有叉用咩?做D好嘢畀全世界睇下,等大家尊敬下你,影視圈講實力同結果嘅,你玩咗幾年上曬頭版,夠啦,咪再找藉口了,不投電影便死開,躲回你的大宅等收皮,無膽匪類,妖,睇你唔起呀!

blog14

堅定物流 – 劉定堅

作者簡介

三十年前創作《蝦仔爹哋》,開創盧海鵬無釐頭金句,創下處境喜劇神話記錄的劉定堅,八十年代轉戰烽火連天的港漫市場,創作了最輝煌年代的《中華英雄》,並成為極少數的代表,只憑藉創作人身份,建立個人出版企業《自由人出版集團》,創作並出版了包括《刀劍笑》、《超神Z》、《狄克戀曲》、《賭聖》等等大批經典漫畫作品;及後進軍小說市場,《刀劍笑新傳》開創了周刋武俠小說神話,憑逾百部作品打開了中、港、台三地市場,經過長時間投入電影及動畫創作及製作,年多前開始進軍國內影視市場,身兼編劇、導演、製作人及投資者四合一身份,繼續挑戰更複雜的龐大市場,延展創作生命。

評論

評論

7