火鍋同打邊爐之間， 有好大嘅選擇空間！
[vc_column_text pb_margin_bottom=”no” pb_border_bottom=”no” width=”1/1″ el_position=”first last”]
時：晚上，20:17前夕
地：香家．飯廳
人：香員外、香夫人、香大少、香二少、香三妹、奶媽
奶媽：大少、二少、三小姐，你哋想好晚餐想食乜嘢未呢？
香大少：我哋終於唔駛再食大鑊飯，可以自己選擇晚餐，實在太好喇！咳咳，我想食乾炒牛河，同埋咕嚕肉，唔知可唔可以呢？
香二少：我要一客西冷牛扒，五成熟，配一支1984年嘅lafite。
香三妹：我減肥，吃壽司！
奶媽：大老爺已經為大家準備好兩個選擇：火鍋，同埋打邊爐。
香大少：嗯…乾炒牛河，同埋咕嚕肉，被稱為「廚房兩大剋星」，對奶媽嚟講太困難喇！我撤回頭先嘅方案，堅決擁護同支持阿爺畀我哋嘅最好選擇，不過我想聽聽三弟同三妹嘅意見先。
香三妹：我減緊肥，食火鍋同打邊爐都冇問題，只要有多啲蔬菜就OK！
香二少：有冇搞錯啊！火鍋同打邊爐，咁樣都叫有得揀？
香員外：老二，唔好嘈！火鍋同打邊爐之間，有好大嘅選擇空間！
香大少：父親大人講得啱！「火鍋」兩個字，「打邊爐」就三個字，一字之差，當中存在好大嘅空間啊！
香二少：大哥，三妹，基本上，阿爺應承咗我哋，畀我哋有真正嘅選擇權，並唔係呢啲經過篩選嘅假民主！
奶媽：二少，唔好勞氣，我哋要「有商有量，選擇晚餐」。
香二少：既然係「有商有量」，點解阿爺完全唔接納我提出嘅方案？
香員外：老二，唔准頑皮，我哋要「有根有據，選擇晚餐」。
香二少：吓！？頭先仲話「有商有量」，依家就變咗「有根有據」？你哋班大人玩晒啦！
香大少：老二，你唔好再拗頸喇！我哋要「把握機會，選擇晚餐」！我已經好肚餓喇！你就咁樣拖落去，隨時連宵夜都冇得食啊！
香夫人：乖仔，食住先啦！「食住先」有三個好處：第一，我哋唔可以原地踏步；第二，「選擇早餐」同埋「選擇午餐」嘅機會都會落空；第三，我哋要為香家尋求新出路。
香員外：老二，你必須感謝爺爺，佢已經為我哋準備咗最好嘅晚餐選擇！
香二少：哼！你哋根本話唔倒事！我哋要同阿爺直接對話！如果阿爺唔肯同我哋傾，大哥、三妹，我哋就要佔領廚房！
香大少：佔領廚房太暴力喇！我反對！
香三妹：我減緊肥，冇氣力去佔領廚房……
奶媽：二少，你佔領廚房，阻住我開工，隨時令我冇咗個飯碗！
香夫人：你再係咁頑皮，我就扣你零用錢！唔畀表妹嚟陪你玩！
香員外：我再重申一點：火鍋同打邊爐之間，有好大嘅選擇空間！
香二少：……
[/vc_column_text] [vc_column_text pb_margin_bottom=”no” pb_border_bottom=”no” width=”1/1″ el_position=”first last”]
故弄玄虛 – 何故
作者簡介
何故，跨媒體創作人，集作家、編劇、影評人、文化策劃人、電台節目主持、以及大學講師於一身。正職吃火鍋，兼職搞創作。
何故專頁：何故火鍋館 http://www.facebook.com/dabianlu
[/vc_column_text]
