偵探社收數？ 咪玩啦！
最近一次聚會中見番一個移民加拿大，十幾年冇見的舊同學，大家傾開，佢話我知一次搵私家偵探收數的受騙經歷，希望我攞嚟同大家分享，起警戒之效。
事緣佢要追討一筆約共六十萬的舊債，對方還咗兩期即告潛水，因為現金交收又沒有白紙黑字，用正常法律程序做唔到嘢。誤打誤撞下，同學仔在報紙分類廣告搵到一間偵探社，聲稱專收爛帳。對方開價全數百分之四十，成廿四萬。
同學仔將債仔電話、車牌號碼、住邊條街﹝詳細地址唔知﹞交給偵探社。一星期左右，那間「收數偵探社」話債仔資料均是「太空料」﹝假資料﹞，起唔到個人資料；如要起底另收一萬。同學心諗反正不差一萬，就俾咗錢。又一星期，「收數偵探」通知車牌係公司登記，可以由工作地方著手跟佢返屋企，到時就會上門搵佢，天花龍鳳。點知成兩個月都冇消息，同學仔忍唔住追問進展，對方竟然話：「TARGET好硬淨，要好好教訓佢再傾！會安排另一TEAM人再跟進。」
兩日後，同學仔收到自稱「偵探社行動組」的電話，聲稱有計保證最少收到十萬，但要先收兩萬行動費。「行動組」話知道TARGET有物業，可以捉佢去按或者去搵財仔套現，如果借唔到呢個數，最後仲可以挾佢去賭。借都仲話啫，點賭呀？同學仔越聽越覺得唔對路，「行動組」於是侃侃而談其必勝大計，就係搭個棚，設下天仙局，然後捉TARGET上船，抵押物業做賭本，在水魚必輸的情況下，就可以「嬴」佢個物業用來還債。
同學仔心知中伏，老實講，如果佢有物業，一早就有其他方法做嘢啦，仲使遇到你班老千？於是反客為主，向「行動組」提出條件，話既然咁有把炮保證起碼收十萬，咁一於豪啲，區區兩萬「行動費」唔好講住，事成後直頭俾五萬！另外，如果收到多過十萬，之後每一萬俾五千做獎金。結果點？對家當然縮沙，後來成件CASE就不了了之，一直拖到而家都未搞掂。
同學仔浪費了一萬元及兩個月的心神，雖然好唔甘心，但都冇辦法，小弟唯有其將經歷公開，警惕大家搵偵探社要打醒十二分精神，否則容易帶來雙重損失；而我亦在此補充，正常的調查公司是不會做收數工作的！
一目偵信 – 上校
作者簡介
調查公司高級總監，曾當軍旅生涯，亦曾為人師表，轉投調查生涯，只為人生加添豐厚色彩。認為調查工作，有如行軍布陣，歩歩為營，不能稍有差池。享受艱苦搜證過程，從抽絲剝繭中，破解隱藏，還原真相。
